Toshkent, O‘zbekiston (UzDaily.uz) — Xitoyga tashrif doirasida Investitsiyalar, sanoat va savdo vazirining birinchi o‘rinbosari Nozimjon Xolmurodov boshchiligidagi “O‘zcharmsanoat” uyushmasi delegatsiyasi Hebei Boxing Intelligent Co. LTD kompaniyasi rahbariyati bilan muzokaralar o‘tkazdi.

Uchrashuvda O‘zbekistonning industrial zonalarida ishlab chiqarish quvvatlarini tashkil etish istiqbollari muhokama qilindi. Birinchi bosqichda xitoylik sheriklar mahalliy korxonalar ishtirokida maxsus poyabzal ishlab chiqarishni yo‘lga qo‘yish rejasini taqdim etdi. Tayyor mahsulot asosan Markaziy Osiyo va MDH bozorlariga yo‘naltiriladi.

Kelgusida Hebei Boxing Intelligent O‘zbekistonning maxsus industrial hududlarida qiymati 10 million AQSH dollariga teng yangi sanoat loyihasini amalga oshirishni rejalashtirmoqda. Loyihaning amalga oshirilishi qo‘shimcha ish o‘rinlari yaratish, eksport salohiyatini oshirish va ishlab chiqarish quvvatlarini kengaytirish imkonini beradi.

O‘z navbatida, o‘zbek delegatsiyasi mamlakatda xorijiy investorlar uchun yaratilgan shart-sharoitlar — soliq va bojxona imtiyozlari, infratuzilmaviy qo‘llab-quvvatlash hamda erkin iqtisodiy zonalar imkoniyatlari haqida maʼlumot taqdim etdi. Bu esa kelgusi hamkorlik uchun keng istiqbollar ochib berishi qayd etildi.