Toshkent, O‘zbekiston (UzDaily.uz) — Joriy yil 27 avgust kuni O‘zbekiston Savdo-sanoat palatasi raisi o‘rinbosari Dilshod Rasulov "Xalqaro savdo palatasi" Hududiy maslahat guruhi raisi, BMT Bosh kotibining Kavkaz va Markaziy Osiyo bo‘yicha maxsus vakili Fadi Asli bilan uchrashuv o‘tkazdi.

Muloqot davomida O‘zbekiston Savdo-sanoat palatasining "Xalqaro savdo palatasi"ga aʼzo bo‘lishi va rasmiy ro‘yxatdan o‘tishi, shuningdek, mazkur tashkilotning mamlakatimizda vakolatxonasini ochish masalalari atroflicha muhokama qilindi.

Bu tashabbus, avvalo, O‘zbekiston tadbirkorlarining xalqaro bozorga chiqishi, biznes aloqalarini kengaytirishi hamda investitsiyaviy hamkorlikni mustahkamlashi uchun muhim qadam sifatida qayd etildi.

Fadi Asli o‘z nutqida O‘zbekiston tomonining tashabbuslarini to‘liq qo‘llab-quvvatlashini va ularni amalga oshirishda zarur institutsional va amaliy ko‘mak ko‘rsatishga tayyorligini taʼkidladi.

Uchrashuv samimiy va ishonchli ruhda o‘tib, tomonlar belgilangan maqsadlarga erishish yo‘lida doimiy muloqot va amaliy hamkorlikni izchil davom ettirishga kelishib oldilar.