Toshkent, O‘zbekiston (UzDaily.uz) — O‘zbekiston Sog‘liqni saqlash vazirligi fuqarolarni kosmetologiya xizmatlarini tanlashda ehtiyotkor bo‘lishga va faqat litsenziyaga ega tibbiyot tashkilotlariga murojaat qilishga chaqirdi.

Vazirlik maʼlumotlariga ko‘ra, keyingi paytlarda ijtimoiy tarmoqlar yoki ayrim go‘zallik salonlari peshlavhalarida ayollar sartaroshxonasi, manikyur, pedikyur xizmatlari ro‘yxatida kosmetolog muolajalari bilan bog‘liq eʼlonlarga ham tez-tez ko‘zimiz tushmoqda.

SSV bunday xizmatlardan so‘ng salbiy oqibatlarga duch kelgan ayollar murojaatlari ko‘payganini taʼkidladi. Ijtimoiy tarmoqlarda ham kosmetik muammolardan xalos bo‘lish uchun murojaat qilib, aksincha yangi va kutilmagan muammolarga duch kelganlar shikoyatlari muntazam eʼlon qilinadi.

«Oddiy go‘zallik salonlari yoki tibbiyot tashkiloti hisoblanmaydigan turli kosmetologiya markazlarida tegishli maʼlumotga ega bo‘lmagan shaxslar tibbiy kosmetologiya bilan shug‘ullanayotgani bu muammolarning bosh omilidir», — dedi Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi direktori Ulug‘bek Sabirov. Uning so‘zlariga ko‘ra, bunday shaxslar yakka tadbirkor yoki o‘zini o‘zi band qilgan sifatida ro‘yxatdan o‘tgan bo‘lib, rasman ishlaydilar, lekin tibbiy maʼlumotga ega emaslar va ularning faoliyati sog‘liqni saqlash organlari tomonidan nazorat qilinmaydi.

Shu bilan birga, Sog‘liqni saqlash vazirligi maʼlumoticha, tibbiy kosmetologiya xizmatlariga litsenziyaga ega xususiy tibbiy tashkilotlarda bunday asoratlar kuzatilmagan.

Ayni paytda O‘zbekistonda tibbiy kosmetologiya faoliyati bilan shug‘ullanish huquqiga ega 147 nodavlat tibbiy tashkilot mavjud bo‘lib, ularning 94 tasi Toshkentda joylashgan. Kosmetologiya xizmatlari ko‘rsatadigan, lekin tibbiy tashkilot maqomiga ega bo‘lmagan go‘zallik salonlari soni esa ancha yuqori.

«Kosmetologiya tartiblari — bu tibbiy faoliyat bo‘lib, ularni faqat shifokorlar amalga oshirishi va litsenziyalanishi shart», — deya taʼkidlashdi vazirlikda. Shu maqsadda, sohadagi huquqiy asosni mustahkamlash uchun tibbiy kosmetologiya xizmatlarini ko‘rsatish tartibi va davlat tibbiyot muassasalarida kosmetolog shifokorlar faoliyatini tartibga soluvchi tegishli buyruq ishlab chiqilgan.

Vazirlik fuqarolarga ehtimoliy asoratlardan ogohlantirgan holda, faqat davlat tibbiyot muassasalari yoki litsenziyaga ega xususiy tibbiy tashkilotlar xizmatidan foydalanishni qatʼiy tavsiya qildi.

« O‘zingiz, oila aʼzolaringiz va yaqinlaringiz salomatligini asrang», — deya ogohlantirdi Sog‘liqni saqlash vazirligi.