Toshkent, O‘zbekiston (UzDaily.uz) — O‘zbekiston Oliy Majlisi Senati raisi Tanzila Norboyeva Sankt-Peterburgda bo‘lib o‘tgan MDH Parlamentlararo Assambleyasining 57-sessiyasida mamlakat parlament delegatsiyasiga rahbarlik qildi.

Sessiya davomida demokratik rivojlanishda xalqaro saylov kuzatuvining o‘rni va MDH Parlamentlararo Assambleyasining demokratik prinsiplarni ilgari surish, hamda davlatlararo hamkorlikni mustahkamlash borasidagi faoliyati muhokama qilindi. Tanzila Norboyeva O‘zbekiston tomonidan ishlab chiqilgan tashabbuslarni taqdim etdi.

MDH Parlamentlararo Assambleya kuzatuv missiyalari hozirgi kunga qadar 100 dan ortiq saylov kampaniyalarini monitoring qilishda ishtirok etgan. Ularda O‘zbekiston parlamenti a’zolari faol ishtirok etib kelmoqda. Prezident Shavkat Mirziyoyev tashabbusi bilan tashkil etilgan Saylov organlari rahbarlarining maslahat kengashi faoliyati alohida e’tirof etildi.

O‘zbekiston parlament delegatsiyasi yig‘ilishda Assambleyaning ko‘p tomonlama hamkorlikni mustahkamlashga qaratilgan model qonunlari va tavsiyalarini qo‘llab-quvvatladi. Ular mamlakat manfaatlarini aks ettirib, qonunchilik tashabbuslarini rivojlantirishga xizmat qiladi.