Toshkent, O‘zbekiston (UzDaily.uz) — O‘zbekiston Kaspiy dengizida parom qatnovini yo‘lga qo‘yish niyatida. Bu haqda Turkmanistonda o‘tkazilgan yuqori darajadagi uch tomonlama uchrashuv yakunlari bo‘yicha «O‘zbekiston 24» telekanaliga bergan intervyusida transport vaziri Ilhom Maxkamov maʼlum qildi.

Uning maʼlumotiga ko‘ra, ushbu yo‘nalishda yuk tashish hajmining ortishi 30–40 kunlik tiqilib qolishlarga olib kelmoqda. Shu bois, O‘zbekistonga tegishli o‘z kemalarining mavjudligi yuklarni tashish jarayonini sezilarli darajada tezlashtirish imkonini beradi.

Avaza shahridagi sammit doirasida O‘zbekiston va Turkmaniston kemasozlik sohasida o‘zaro anglashuv to‘g‘risidagi memorandumni imzoladi.

Bundan tashqari, O‘zbekiston kemalarni nafaqat Turkmanistonda, balki Ozarbayjonda ham sotib olishni rejalashtirmoqda.

«Turkmaniston va Ozarbayjonda kemasozlik zavodlari faoliyat yuritmoqda. Biz ushbu korxonalardan kema xarid qilish imkoniyatlarini o‘rganish va ko‘rib chiqishga kelishib oldik. Barcha texnik jihatlarni chuqur ishlab chiqish zarur. Imzolangan hujjat esa texnik va tijorat masalalarini erkin hal etish uchun shart-sharoit yaratadi», — deya taʼkidladi Ilhom Maxkamov.