Toshkent, O‘zbekiston (UzDaily.uz) — O‘zbekiston Savdo-sanoat palatasi raisining birinchi o‘rinbosari Davronbek Qurbonov boshchiligidagi delegatsiya Avstriyaga xizmat safari doirasida biznesga o‘qitish va kasbiy tayyorgarlik sohasida faoliyat yuritayotgan WiFi International kompaniyasi rahbari Klaudiya Noymann bilan uchrashdi.

WiFi International – iqtisodiy rivojlanish, mijozlar boshqaruvi va kasb-hunar taʼlimi yo‘nalishlarida yetakchi kompaniya hisoblanadi. 2024 yilga qadar kompaniya tomonidan 33 mingta trening tashkil etilgan bo‘lib, ularda 350 mingga yaqin ishtirokchi bilim va ko‘nikmalarga ega bo‘lgan. Shuningdek, 9 mingdan ziyod xalqaro ISO sertifikatlari topshirilgan.

Uchrashuv davomida delegatsiyaga kompaniyaning erishgan natijalari va o‘quv dasturlari taqdim qilindi. Shu bilan birga, Farg‘ona vodiysida tashkil etilgan Hududiy biznes-inkubatorlar faoliyati haqida ham tajriba almashildi.

Uchrashuv yakunlari bo‘yicha ikki tomonlama aloqalarni yo‘lga qo‘yish va WiFi International tajribasini O‘zbekistonga tatbiq qilish borasida kelishuvlarga erishildi.