Toshkent, O‘zbekiston (UzDaily.uz) — 6-avgust kuni "O‘zatom" delegatsiyasi Belarus atom elektr stansiyasida bo‘ldi. Tashrif davomida stansiya rahbariyati mehmonlarni AES faoliyati bilan tanishtirdi. Bundan tashqari, O‘zbekiston tomonini qiziqtirgan masalalar yuzasidan muzokaralar olib borildi.

Belarus tomoni BelAESni qurishning asosiy bosqichlari – texnologiyani tanlashni asoslash, me’yoriy va institutsional bazani tayyorlashdan tortib, stansiyani bevosita qurish va foydalanishgacha, shu jumladan loyiha boshqaruvi, tartibga soluvchi organlar bilan o‘zaro hamkorlik, yadroviy va radiatsiya xavfsizligini ta’minlash, shuningdek, sohani samarali kadrlar bilan ta’minlash bo‘yicha tajriba almashdi.

O‘zbekiston delegatsiyasi BelAES o‘quv-mashg‘ulot markazi bilan tanishdi, u yerda mumkin bo‘lgan barcha shtatdan tashqari vaziyatlar modellashtiriladi va ulardan normal chiqish bo‘yicha harakatlar ishlab chiqiladi. Markaz AESda qo‘llaniladigan boshqaruv pultlarini nusxalaydigan keng ko‘lamli trenajyorlar bilan jihozlangan bo‘lib, bu xodimlarning stansiya ish jarayonlariga to‘liq sho‘ng‘ishi va barcha ko‘nikmalarni o‘zlashtirishni ta’minlaydi.

Markaz AESdan foydalanish bo‘yicha mutaxassislar tayyorlaydi, shuningdek, ularni qayta tayyorlash va stajirovkadan o‘tkazish bilan shug‘ullanadi. Xodimlar doimiy ravishda turli shtatdan tashqari vaziyatlarni imitatsiya qiluvchi testlar o‘tkazish orqali malakasini oshirish bo‘yicha o‘qitiladi.

Tomonlar, shuningdek, jamoatchilik bilan o‘zaro hamkorlik qilish, jumladan, jamoatchilik eshituvlarini o‘tkazish va atom energiyasidan tinch maqsadlarda foydalanishning jamoatchilik tomonidan maqbullik darajasini oshirish bo‘yicha tajriba almashdilar.

Professional ta’lim sohasida mutaxassislar tayyorlash va tajriba almashish masalalariga alohida e’tibor qaratildi. Ushbu yo‘nalishda O‘zbekiston ikki mamlakatning tegishli oliy o‘quv yurtlari o‘rtasidagi hamkorlik istiqbollarini ko‘rmoqda.

Belarus AES "Rosatom" Davlat korporatsiyasi loyihasi bo‘yicha qurilgan va 2023-yilda to‘liq ishga tushirilgan. Bugungi kunda uning jami o‘rnatilgan quvvati 2 400 MVtni tashkil etadi. Belarus AESning asosiy xususiyati — AESning tashqi va ichki ta’sirlarga maksimal chidamliligini ta’minlaydigan faol va passiv xavfsizlik tizimlarining noyob uyg‘unligidir.

Har bir energiya bloki "eritma tuzog‘i" — yadro reaktorining faol hududidagi eritmani lokalizatsiya qilish qurilmasi, shuningdek, energiya ta’minoti to‘liq bo‘lmagan vaziyatda operatorlar ishtirokisiz ishlashga qodir bo‘lgan boshqa passiv xavfsizlik tizimlari bilan jihozlangan.