Toshkent, O‘zbekiston (UzDaily.uz) — Shvetsiyaning ijtimoiy inklyuzivlik sohasidagi xayriya tashkilotlari – “MISA”, "Wilja Gruppen AB", "RAOUL Charity Foundation" vakillaridan iborat delegatsiyasi O‘zbekistonda bo‘lib turibdi, deb xabar qilmoqda “Dunyo” AA muxbiri.

Safar davomida delegatsiya O‘zbekiston Prezidenti huzuridagi Ijtimoiy himoya agentligi hamda ijtimoiy inklyuzivlik yo‘nalishidagi faoliyat ko‘rsatayotgan qator davlat va nodavlat tuzilmalarida uchrashuvlar o‘tkazdi. 

Xususan, Hamjamiyatlarni mustahkamlash va ijtimoiy farovonlikni rivojlantirish markazida bo‘lib o‘tgan muzokaralar chog‘ida nogironligi bo‘lgan shaxslar bilan ishlovchi ijtimoiy xodimlarni tayyorlash, ularning malakasini oshirish va hamrohlik xizmatlarini joriy etish bo‘yicha Shvetsiya tajribasi muhokama qilindi.

Shvetsiya xayriya tashkilotlari vakillari, shuningdek, nogironligi bo‘lgan o‘zbekistonliklar ishlab chiqargan mahsulotlarning "Inson uchun" savdo ko‘rgazmasida va Inklyuziv biznes-forumida ishtirok etishdi.