Toshkent, O‘zbekiston (UzDaily.uz) — 2025-yil 28-mart kuni Myanmaning markaziy qismida 7,7 magnitudali kuchli zilzila sodir bo‘ldi. U nafaqat mamlakat ichida, balki qo‘shni davlatlarda ham vayronagarchilik va vahima keltirib chiqardi.

AQSh Geologiya xizmati (USGS) ma’lumotlariga ko‘ra, yer osti silkinishlari Grinvich vaqti bilan 06:20:54 da Sagayng shahri yaqinida, undan taxminan 12 kilometr shimoli-g‘arbda qayd etilgan. Zilzila epitsentri 10 kilometr chuqurlikda joylashgan edi.

Tabiiy ofat Myanmaning ko‘plab hududlarida, shuningdek, qo‘shni Tailand, Bangladesh, Hindiston, Laos va Xitoyda ham sezildi. Mamlakat rasmiylari Myanmaning ikkinchi yirik shahri bo‘lmish Mandalayda katta talafotlar haqida xabar bermoqda. Tarixiy yodgorliklar, jumladan, qirollik saroyining ayrim qismlari zarar ko‘rgan, turar-joy binolari va infratuzilma obyektlari shikastlangan.

Zilzila oqibatlari Tailandga ham ta’sir ko‘rsatdi. Reuters axborot agentligi xabariga ko‘ra, Bangkokda qurilayotgan osmono‘par bino qulab tushgan, natijada o‘nlab ishchilar vayronalar ostida qolgan, bir kishi halok bo‘lgan.

Mandalay va Yangon o‘rtasidagi yo‘l infratuzilmasi ham jiddiy zarar ko‘rgan. 90 yillik eski ko‘prikning shikastlanishi mintaqadagi transport aloqalarini sezilarli darajada qiyinlashtirishi mumkin.

Myanma hukumati favqulodda holat e’lon qilib, qidiruv-qutqaruv ishlarini boshlab yubordi. Xuddi shunday choralar Bangkokda ham ko‘rildi: Tailand bosh vaziri poytaxtda favqulodda holat joriy etdi, fond bozorining faoliyatini vaqtincha to‘xtatdi va fuqarolarni ehtiyotkorlikka chaqirdi.

Halok bo‘lganlar va jabrlanganlar soni bo‘yicha rasmiy ma’lumotlar hali aniqlashtirilmoqda. Qutqaruv xizmatlari vayronalarni tekshirishda davom etmoqda, va rasmiylar qurbonlar soni yaqin soatlarda sezilarli darajada oshishi mumkinligidan xavotir bildirmoqda.