Toshkent, O‘zbekiston (UzDaily.uz) — 23 iyul kuni o‘zbekistonlik dzyudochilar Jahon yozgi Universiadasida ishtirokini boshladi va ishtirokning birinchi kuniyoq vazni 48 kilogrammgacha bo‘lgan toifadagi sportchi Laziza Haydarova bronza medaliga sazovor bo‘ldi.

Yarim finalgacha yetib kelgan Haydarova uchinchi o‘rin uchun bellashuvda Polsha vakili Paulina Shlaxtaga qarshi gilamga chiqdi va texnik usul orqali vazari ochkosi olib, g‘alaba qozondi.

Shu tariqa, O‘zbekiston terma jamoasining medallar jamg‘armasi yana bir bronza medali bilan boyidi va hozirgi holatda jamoa hisobida 2 ta oltin, 4 ta kumush va 6 ta bronza medali mavjud.