Toshkent, O‘zbekiston (UzDaily.uz) — Respublika Koreya va Markaziy Osiyoning besh davlati o‘rtasida 2025 yilda o‘tkazilishi rejalashtirilgan birinchi sammit 2026 yilga qoldirildi. Bu haqda Koreya Respublikasi tashqi ishlar vazirining birinchi o‘rinbosari Pak Yun Jju maʼlum qildi.

Diplomatning taʼkidlashicha, sammitni keyingi yilga ko‘chirish qarori Seuldagi ichki siyosiy holat va sammitda qatnashuvchi davlatlar ish jadvalining zichligi bilan bog‘liq. Unga ko‘ra, barcha tomonlar turli variantlarni chuqur o‘rganib chiqishgan, biroq joriy yilda barchaga mos keladigan vaqtni kelishish imkoni bo‘lmagan.

Eslatib o‘tamiz, ushbu sammitni o‘tkazish bo‘yicha kelishuv 2024 yil yozida, Janubiy Koreyaning sobiq prezidenti Yun Sok Yolning Markaziy Osiyoning uch davlatiga qilgan tashrifidan so‘ng erishilgan edi.

Kutilganidek, sammit Koreya va Markaziy Osiyo mamlakatlari o‘rtasida siyosiy muloqot va mintaqaviy sheriklikni yangi bosqichga olib chiqishi lozim edi.