Toshkent, O‘zbekiston (UzDaily.uz) — Hozirgi vaqtda Farg‘ona viloyati Qo‘qon shahri hokimining birinchi o‘rinbosari Nemat Normatovich Hamidov boshchiligidagi O‘zbekiston rasmiy delegatsiyasi ishchi tashrif bilan Bashkortostanda bo‘lib turibdi.

Tashrif doirasida qo‘qonlik «R-A-M ORGANIZATION» kompaniyasi Bashkortostandan O‘zbekistonga mahsulot yetkazib berish bo‘yicha qator shartnomalarni imzoladi.

Uchrashuvda tomonlar Sterlitamak shahrida o‘tgan «Kupes 2.0» festivalida delegatsiya ishtirokining natijalarini, shuningdek, Sterlitamak va Qo‘qon shaharlari o‘rtasidagi hamkorlik yo‘l xaritasida ko‘zda tutilgan tadbirlarni muhokama qildi.

«Ko‘p yillik samarali hamkorlik hududlarimizni sanoat va qishloq xo‘jaligi kabi turli sohalarda bog‘lab kelmoqda.

Bashkortostan Rossiyaning O‘zbekiston bilan tashqi iqtisodiy aloqalarida muhim o‘rin tutadi. Qo‘qon kompaniyasi bilan yangi shartnomalar imzolanishi o‘zbek hamkorlar bilan o‘zaro munosabatlarda yangi bosqichni ochadi», — dedi Bashkortostan Hukumati raisi o‘rinbosari, sanoat, energetika va innovatsiyalar vaziri Aleksandr Nikolayevich Sheldyayev.

Muzokaralar chog‘ida tomonlar kelgusidagi hamkorlik istiqbollarini, jumladan, joriy yilda Bashkortostan rasmiy delegatsiyasining O‘zbekistonga tashrifini ham muhokama qildi.

«Biz mamlakatlarimiz o‘rtasida iqtisodiy va tijorat hamkorligini kuchaytirishga qaratilgan kompleks harakatlar rejasini amalga oshirish uchun katta saʼy-harakatlar qilmoqdamiz. Yangi shartnomalar imzolanishi har ikki shahar rivojida va ikki tomonlama aloqalarni mustahkamlashda muhim bosqich bo‘ladi», — deya taʼkidladi Bashkortostan Respublikasining tashqi iqtisodiy aloqalar va kongress faoliyati vaziri Margarita Bolicheva.